រដ្ឋាភិបាលប្រទេសស្វីសចុះហត្ថលេខាបន្ដផ្ដល់ជំនួយដល់មន្ទីរពេទ្យគន្ធបុប្ផា
15-March-2016 | ដោយ មែន កំសត់
ភ្នំពេញ ៖ រដ្ឋាភិបាលកម្ពុជានិងស្វីស នៅរសៀលថ្ងៃអង្គារនេះ នឹងចុះហត្ថលេខាលើកិច្ចព្រមព្រៀងស្ដីពីកិច្ចសហប្រតិបត្ដិការបច្ចេកទេស ហិរញ្ញវត្ថុសេដ្ឋកិច្ចនិងជំនួយមនុស្សធម៌ ដែលក្នុងនោះមានការផ្តល់ជំនួយដល់មន្ទីរពេទ្យគន្ធបុប្ផាផងដែរ។
សេចក្ដីជូនព័ត៌មានមួយចុះថ្ងៃទី១៤ ខែមីនា បានឲ្យដឹងថានៅថ្ងៃទី១៥ ខែមីនា វេលាម៉ោង៣និង៣០នាទីរសៀលនេះ នៅទីស្ដីការក្រសួងការបរទេស ឯកឧត្តម ហោ ណាំហុង រដ្ឋមន្ដ្រីការបរទេសកម្ពុជានិងលោក អ៊ីវ៉ូ ស៊ីបី(Ivo SIEBER)ឯកអគ្គរដ្ឋទូតស្វីសប្រចាំប្រទេសកម្ពុជា នឹងចុះហត្ថលេខាលើកិច្ចព្រមព្រៀងរវាងរដ្ឋាភិបាលកម្ពុជានិងរដ្ឋាភិបាលសហព័ន្ធស្វីស ស្ដីពីកិច្ចសហប្រតិបត្ដិការបច្ចេកទេស ហិរញ្ញវត្ថុសេដ្ឋកិច្ចនិងជំនួយមនុស្សធម៌។
សេចក្ដីជូនព័ត៌មានបានឲ្យដឹងទៀតថាការចុះហត្ថលេខាលើកិច្ចព្រមព្រៀងនេះបានបញ្ជាក់ជាថ្មីម្ដងទៀតពីការប្ដេជ្ញាចិត្ដរបស់ប្រទេសស្វីសក្នុងការជួយដល់ការអភិវឌ្ឍកម្ពុជា។ ក្រសួងបានបន្ដថាបច្ចុប្បន្នជំនួយហិរញ្ញវត្ថុប្រចាំឆ្នាំរបស់ស្វីសចំពោះកម្ពុជាមានចំនួន១២លានដុល្លាអាមេរិក ដែលផ្ដោតលើអភិបាលកិច្ចមូលដ្ឋាននិងការចូលរួមរបស់ពលរដ្ឋ កសិកម្មនិងសន្ដិសុខស្បៀង ការអភិវឌ្ឍជំនាញនិងការងារនិងជួយដល់មន្ទីរពេទ្យគន្ធបុប្ផា។
បើតាមក្រសួងការបរទេសកម្ពុជា រដ្ឋាភិបាលស្វីសបានជួយគាំទ្រដល់មន្ទីរពេទ្យគន្ធបុប្ផា ចាប់តាំងពីឆ្នាំ១៩៩៤ ក្នុងថវិកាសរុបចំនួន៥៥លានដុល្លាអាមេរិក។ ថវិការួមវិភាគទានប្រចាំឆ្នាំរបស់ស្វីសដល់មន្ទីរពេទ្យគន្ធបុប្ផា មានចំនួន៤លានដុល្លារអាមេរិក៕
ចំនួនអ្នកទស្សនា
- ថ្ងៃនេះ12031
- ម្សិលមិញ10851
- សប្តាហ៍នេះ78551
- ខែនេះ193701
- ឆ្នាំនេះ193701
- សរុប20636157